МИРЭ ШТЭТОСКЭ

На прогыём мэ паш-дром,

Палэ дыкхав-пэ, рисёвав палал,

Нэ мэк пхэнэн, со мэ тэрно сом,

Мэк спробинэла варикон тэ подсал.

Сыр дадывэс душло амаро кхэроро,

Кай чяворэса псирдём пиранго,

Сыр дэ суно до рэкица панорьеса -

Дой промы* кэравас мирэ раклорэса.

Тэрдэ ангил якха до восень, до ивант,

Кай тхуворэ сарэ бовэндыр джян,

Годы и зор лыём мэ да штэтостыр,

Кэ джиипэ гыём дадэскирэ крокостыр**.

Промар ту, мро ило, нэ, збага ту, мро ди,

Долэ славутнонэ чясоскэ,

Катыр мэ сыклёвавас тэ дживав,

Про свэто манушэса тэ явав!

______________

*) промы = лодки

**) кроко = шаго

БИСТЫРДО ГАВ

Скрипин ромэндэ ив тал шлыта,

Дывэс уджяла, враз явэла тамлыпэ*,

Труял прэ фэлда ив пашло дро мразо,

Росчюрдынэ кхэра англэ дро дурипэ.

Забистырдо да штэто манушэндыр,

Пал кхас традэна дуй чявэ-мала**,

Нэ кроме лэндыр дай якха никон на сыкавэла,

Чявэн дай ужакирна пэскрэ мануша -

Пхурья пхурэнца. Сыг до гав хасёла,

Екхджиныпэн и дар пхурэндэ дро якха,

Лэн бистырдэ сарэ, утрадынэ дро форо,

Рома ж лэн на бистрэна - да пуранэ мала.

Да рангири политика, сави побанькирдя лэн,

Кон пхув камья илэса, и буты камнэ васта.

Дыкх, зачюдэ ромэн - би грэнгиро дживэна,

Сыр удыкхэна лэн пхурэ, чювэна-пэ ясва.

______________

*) тамлыпэ = тёмныма

**) мал = товаришшё, друго

ЛИПА ПАШЫЛ АСИНОВСКО ДРОМ

Паш озеро тэрды вэкитко липа,

Ёй сы душлы сарэ ригэндыр,

Прэ латэ пэрла ив, и пэрна бришында,

Лынаскиро лопотня чириклэндыр.

Упрал дыкхэла кхаморо,

Тэлэ чярья сарэ татькирла,

Пашыл проджяна мануша,

Нэ липа лэнца на ракирла.

Бут одгинэ уж мануша,

Псирдэ дарик, тэлэ бэшэнас,

Рома, гавитка о гадже,

Дро чясо пэс на роскэдэнас.

Корени липа хор мэктя,

Ёй пэс рикирла, сыр ґэрэнца,

До мануша тал латэ, сыр пшала,

Драбакирэлас лэн цвяткэнца.

Сарэса на дарэла вихурьятыр,

Бияндыя дро марибэ ваш джиипэ…

Талано романо дыкхава дрэ да липа -

Дро шыл, бришынд баро хачькирипэ.